Urtero, abenduaren 3an, Euskararen Eguna ospatzen dugu, gure hizkuntza zaindu eta indartzearen garrantzia gogorarazten digun eguna. Erroak Elkartean euskara gure historiaren, gure nortasunaren eta gure zerbitzuetan parte hartzen duten pertsonei laguntzeko dugun moduaren parte da.
Sustraietatik Adarretara proiektuarekin, pauso sendoak ematen jarraitzen dugu euskara erakundearen egunerokoan integratzeko. Proiektu hau 2028an euskara gure barne eta kanpo jardueran bermatuta egongo den kudeaketa eredu bat finkatzera eramango gaituen plan estrategikoaren parte da.
Barrutik sortutako konpromisoa (Sustraiak)
2024an eta 2025ean, gure taldeek motibazio, prestakuntza eta hausnarketa espazioetan parte hartu dute, eguneroko lanean euskararen erabilera bultzatzeko. Horretarako, hainbat dinamika egin ditugu, hala nola gure mintzagrama lantzea, EuskaraTRATUAK edo Euskaraldian parte hartzea. Dinamika horiek talde bakoitzak bere erritmoan aurrera egiten laguntzen dute, hizkuntza-praktikak hobetzeko erronkak eta proposamenak partekatuz.
Eta kanporantz hedatzen da (Adarrak)
Proiektuak inguruko erakundeekin ditugun aliantzak ere indartzen ditu. Donostiako Udala, Urrats euskaltegia, Bagera eta euskalgintzako beste eragile batzuekin elkarlanean ari gara, erabiltzaileek orientazio, prestakuntza eta laguntza zerbitzuetan euskara ikasteko, praktikatzeko eta erabiltzeko aukera errealak izan ditzaten.
Prestakuntza tailerretan euskarazko materialak, egokitutako jarduerak, rol jokoak, ikusizko hiztegia eta modulu espezifikoak eskaintzen ditugu arreta soziosanitarioan, iturgintzan, soldaduran edo ostalaritzan prestatzen ari direnentzat.
Euskara inklusiorako tresna gisa
Gizartean parte hartzea, enplegagarritasuna eta aukera berdintasuna errazten dituen tresna gisa sinesten dugu euskara. Horregatik, Erroak Elkartean eskaintzen ditugun orientazio, prestakuntza eta laguntza prozesu guztietan presente egotea nahi dugu.
Euskararen Egunean lortutako aurrerapenak ospatzen ditugu, eta, batez ere, euskara sustraietatik adarretaraino indartzen jarraitzeko konpromiso kolektiboa berresten dugu.
ZUGAN, NIGAN, GUGAN
