Joan den otsailaren 4an, Donostiako Gure Artean eta Emari taldeetan parte hartu zuten emakumeek, Pasaiako Andere Guneak emakume taldeak eta Abian Andoaingo taldeak bisita bat egin zuten Euskal Herriko Unibertsitateko (EHU) Materialen Fisika Zentrora (CFM), Emakumeak Zientzian ekimenaren barruan.
Tailer-bisita, Esperientziaren boterea izenekoa, Zientzia-leihoak proiektuaren barruan kokatzen da. Jarduera honetan mundu zientifikora hurbiltzeko aukera eskaini zen, ingurune hurbil eta parte hartzaile batean.
Jardunaldian, parte-hartzaileek zentroan egiten den lana ezagutu zuten, ikertzaileekin hitz egin zuten eta esperimentu txiki errazak egin zituzten, jakin-mina pizteko eta zientzia modu irisgarrian erakusteko diseinatuak.
Dibulgazio-edukiaz gain, bisitak espazio lasaia sortu zuen esperientziak partekatzeko eta topaketa-denboraz gozatzeko, parte-hartzea eta talde-ikaskuntza bultzatuz.
Jarduera honen helburua zientzia emakume guztiengana hurbiltzea da, bereziki horrelako espazioetara iristeko aukera gutxien dituzten kolektiboetako kideengana, hainbat eremutan konfiantza, interesa eta parte-hartzea sustatuz.
Erroak Elkartetik eskerrak eman nahi dizkiegu Emakumeak Zientzian eta Materialen Fisika Zentroko lantaldeari egindako harreragatik eta ekimen honetan parte hartzeko aukeragatik, oso aberasgarria izan baita guztiontzat.